ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Մեկնարկել է «Կրթության ժամանակակից հիմնախնդիրները» ամառային դպրոցը

20.06.2016

Հունիսի 20-ից Խ. Աբովյանի անվան Հայաստանի պետական մանկավարժական համալսարանում մեկնարկեց «Կրթության ժամանակակից հիմնախնդիրները» երիտասարդ գիտնականների ամառային դպրոցը, որն անցկացվում է ՀՀ ԿԳՆ գիտության պետական կոմիտեի ֆինանսավորմամբ: Դպրոցի բացմանը ողջույնի խոսքով հանդես եկան ՀՀ ԿԳ փոխնախարար Մանուկ Մկրտչյանը, ՀՀ ԳԱԱ ակադեմիկոս Էդուարդ Ղազարյանը, ինչպես նաև ՀՀ ԿԳՆ ԳՊԿ նախագահի տեղակալ Վարդան Սահակյանը: Պարոն Սահակյանը ԳՊԿ նախագահի անունից ողջունեց ներկաներին՝ կարևորելով ոլորտի համակարգաստեղծ նշանակությունը և կոմիտեի կողմից պատրաստակամություն հայտնելով պետական բյուջեի սահմաններում աջակցություն ցուցաբերել նմանատիպ միջոցառումներին: (ԳՊԿ նախագահ Ս. Հարությունյանի ողջույնի խոսքը՝ ստորև):

Վ. Սահակյանն անդրադարձավ նաև 2016 թվականի մայիսի 19-ին «Հայաստանի Հանրապետության կառավարության և Եվրոպական հանձնաժողովի միջև Եվրոպական միության «Հորիզոն-2020» ծրագրին մասնակցության վերաբերյալ» համաձայնագրի ստորագրմամբ հայ գիտնականների առաջ բացված ֆինանսավորման հնարավորություններին ու խորհուրդ տվեց ներկաներին ակտիվորեն մասնակցել «Հորիզոն 2020»-ի ծրագրերին:

Եռօրյա դպրոցի շրջանակներում  երիտասարդ գիտնականները կփորձեն վերհանել ու վերաիմաստավորել կրթության բնագավառում առկա հիմնախնդիրները, առաջադրել դրանց լուծման տարբերակներ: Դպրոցի աշխատանքները կընթանան հետևյալ ուղղություններով՝ համալսարանի պրոֆեսորների կողմից անցկացվող վարպետության դասեր, բարեկամ համալսարանների հետ առցանց դասախոսություններ, երիտասարդ դասախոսների հետ բաց դասեր և երիտասարդ գիտնականների հեղինակային նախագծերի պաշտպանություններ, կլոր սեղան ու բանավեճ: