Քննարկվեցին գիտության ֆինանսավորման խնդիրները
Ապրիլի 27-ին ՀՀ ԿԳՆ գիտության պետական կոմիտեում հյուրընկալվեցին «Հայաստանի ԱՄՆ շրջանավարտների ասոցիացիա» հասարակական կազմակերպության ներկայացուցիչները:
Հանդիպման առիթը Facebook սոցիալական ցանցում լայն հնչեղություն ստացած «Պահանջում ենք գիտության ֆինանսավորում» թեմայով քննարկումն էր, որին ակտիվորեն մասնակցում են նաեւ նշված կազմակերպության ներկայացուցիչները: Նրանք նպատակ ունեին ավելի մոտիկից ծանոթանալ Հայաստանում գիտության ֆինանսավորման ծավալներին եւ բնագավառում առկա խնդիրներին:
Գիտության պետական կոմիտեի նախագահը ներկայացրեց Հայաստանում գիտության ֆինանսավորման ծավալները՝ համեմատելով Խորհրդային Միության տարիներին Հայաստանի գիտական կազմակերպություններին հատկացվող ֆինանսավորման եւ ներկայումս այլ երկրներում գիտությանը հատկացվող միջոցների հետ: Նա անդրադարձավ Գիտության պետական կոմիտեի եռամյա գործունեությանը, ոլորտի բարեփոխման ուղղությամբ իրականացրած միջոցառումներին, մասնավորապես՝ գիտության մեջ երիտասարդ կադրեր ներգրավելու ուղղությամբ կատարվող աշխատանքներին:
Կոմիտեի նախագահը պատասխանեց հասարակական կազմակերպության ներկայացուցիչների հարցադրումներին, ընդունեց նրանց առաջարկները՝ ակնկալելով այսուհետ առավել սերտ եւ արդյունավետ համագործակցություն:
Տեղեկատվության եւ հասարակայնության հետ կապերի բաժին