ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Հայ-գերմանական գիտության օր

05.10.2015

Հոկտեմբերի 5-ին Երևանի պետական համալսարանի գիտական խորհրդի նիստերի դահլիճում տեղի ունեցավ «Հայ-գերմանական գիտության օր» միջոցառման բացումը:

Միջոցառումը կազմակերպվել է ՀՀ ԿԳՆ գիտության պետական կոմիտեի, Երևանի պետական համալսարանի և Գերմանիայի կրթության և հետազոտությունների դաշնային նախարարության համատեղ նախաձեռնությամբ:

Միջոցառման հիմնական նպատակն է` ամփոփել գիտության ոլորտում հայ-գերմանական համագործակցության ձեռքբերումները, քննարկել երկկողմ հետաքրքրություն ներկայացնող ոլորտներում համագործակցային ծրագրերի իրականացման հեռանկարները:

Միջոցառումը բացեց ՀՀ ԿԳՆ գիտության պետական կոմիտեի նախագահ Սամվել Հարությունյանը (բացման խոսքը՝ ստորև):

Մասնակիցներին իր ողջույնի խոսքը հղեց ՀՀ կրթության և գիտության նախարարը:

Պարոն նախարարը նշեց, որ կրթության և գիտության ոլորտում բոլոր նախադրյալները կան հայ-գերմանական համագործակցության ամրապնդման և համատեղ գիտական ծրագրերի իրագործման համար. ավելի քան 2200 ուսանողներ Գերմանական ակադեմիական փոխանակման ծրագրերով ուսանել և ուսանում են Գերմանիայի առաջատար բուհերում,  քննարկվում  է Հայաստանում գերմանական գիմնազիայի հիմնադրման  ծրագիրը, իրականացվում են  համատեղ գիտական նախագծեր: Նախարարն անդրադարձավ նաև «Հորիզոն 2020» ծրագրին անդամակցելու համար Հայաստանի վարած բանակցություններին: Նա նշեց, որ  ԵՄ շրջանակներում գիտական համատեղ նախագծերի ֆինանսավորման լավագույն գործիքներից  մեկը հանդիսացող «Հորիզոն 2020»  ծրագրին անդամակցելու համար Հայաստանին տրամադրվել են անդամակցության արտոնյալ պայմաններ՝ անդամավճարի նկատելի զեղչ: Նախարարը կոչ արեց  միջոցառմանը ներկա գիտնականներին՝ լինել  ավելի ակտիվ և օգտագործել նոր ծրագրի հնարավորությունները:

Ողջույնի խոսքով հանդես եկան նաև ԵՊՀ ռեկտոր Արամ Սիմոնյանը, Հայաստանում ԳԴՀ դեսպան Մաթիաս Կեսլերը, ՀՀ ԳԱԱ նախագահ Ռադիկ Մարտիրոսյանը:

Հայաստանում գիտության ոլորտում միջազգային, հատկապես, Գերմանիայի հետ համագործակցությանն անդրադարձավ կոմիտեի Միջազգային համագործակցության բաժնի պետ Մարիանա Սարգսյանը:

Հետագա ելույթներն ուղղված էին Հայ-գերմանական գիտակրթական կապերն ամրապնդելուն ուղղված կոնկրետ ծրագրերին: Ելույթներով հանդես եկան ԵՊՀ ռեկտոր Արամ Սիմոնյանը, ՀՀ ԳԱԱ ակադեմիկոս Յուրի Շուքուրյանը, Գերմանիայի կրթության և հետազոտությունների դաշնային նախարարության պատվիրակության անդամները, ԳԴՀ-ում գործող մի շարք գիտական կազմակերպությունների և հիմնադրամների (Հետազոտությունների գերմանական հիմնադրամ, Ֆրաունհոֆերի և Լայբնիցի ասոցիացիաներ, Մաքս-Պլանկի միություն և այլն), ինչպես նաև հայաստանյան բուհերի և գիտական կազմակերպությունների ներկայացուցիչներ:

Գիտության ոլորտում հայ-գերմանական կապերի զարգացման ու ամրապնդման գործում ունեցած ավանդի համար ԳԴՀ կրթության և հետազոտությունների դաշնային նախարարության արևելյան գործընկերության երկրների հետ համագործակցության հարցերով տնօրեն Միխայել Շլիխտը պարգևատրվեց Գիտության պետական կոմիտեի «Ոսկե մեդալով»:

Միջոցառման ընթացքում խիստ կարևորվեց Գերմանական էլեկտրոնային սինքրոտրոնի (DESY) դերը Քենդլ նախագծի իրականացման գործում: Կնքվեց պայմանագիր «Քենդլ» ինստիտուտի  և DESY արագացուցչային կենտրոնի միջև, որը կնպաստի  «Քենդլ» նախագծի շրջանակներում փորձագետների փոխանակմանը, համատեղ հետազոտությունների իրականացմանը, երիտասարդ գիտնականների և ճարտարագետների համար դասընթացների, գիտաժողովների  կազմակերպմանը: 

Ընդհանուր առմամբ, գիտական այս միջոցառումն ուղղված է երկու պետությունների միջև բարեկամական հարաբերությունների ամրապնդմանը, գիտության ոլորտում հայ-գերմանական համագործակցության առավել արդյունավետ կազմակերպմանը, ինչը կընդլայնի հայաստանյան գիտական համայնքի Եվրոպական գիտահետազոտական տարածք ինտեգրման հնարավորությունները:

 

ՀՀ ԿԳՆ ԳՊԿ տեղեկատվության և հասարակայնության հետ կապերի բաժին